Limaj: Ditëlindjen e 13 të Kosovës, po e presim pa një pjesë të bashkëluftëtarëve tanë

Jehona Hulaj

4 years ago

Kryetari i Nismës Socialdemokrate, Fatmir Limaj, uroi qytetarët e vendit me rastin e 13-vjetorit të pavarësisë.

Limaj shkroi se shpallja e pavarësisë 13 vite me parë është kurorëzim i përpjekjeve të popullit shqiptar, që kulmuan me luftën e shenjtë të Ushtrisë Çlirimtare të Kosovës, në krye me komandantin legjendar, Adem Jashari dhe mijëra dëshmorë të tjerë.

“Kjo ditëlindje e 13 e Kosovës sonë të Pavarur, është e para që e presim pa një pjesë të bashkëluftëtarëve tanë, që sot padrejtësisht ndodhen në Hagë”, ka shkruar Limaj.

Urimi i plotë:

Të dashur qytetarë të Republikës së Kosovës,

Sot bëhen 13 vjet nga Shpallja e Pavarësisë së Kosovës, e cila shënon të arriturën më të madhe në historinë e shtetit tonë.

Shpallja e Pavarësisë 13 vite me parë është kurorëzim i përpjekjeve të popullit shqiptarë, që kulmuan me luftën e shenjtë të Ushtrisë Çlirimtare të Kosovës, në krye me komandantin legjendar, Adem Jashari dhe mijëra dëshmorë tjerë.

Kjo ditëlindje e 13 e Kosovës sonë të Pavarur, është e para që e presim pa një pjesë të bashkëluftëtarëve tanë, që sot padrejtësisht ndodhen në Hagë.

Ne do të vazhdojmë angazhimin tonë në mbrojtjen e vlerave kombëtare dhe asnjëherë nuk do të heqim dorë nga përkushtimi për atdheun tonë, Kosovën. Do të punojmë fuqishëm që t’i japim sa më shumë zë, mundit dhe sakrificës së njerëzve të këtij vendi, të cilët me dekada e shekuj janë angazhuar për të realizuar ëndrrën tonë shekullore.

Në këtë ditë historike shprehim mirënjohje dhe u jemi përherë falënderues miqve tanë ndërkombëtarë në krye me Shtetet e Bashkuara të Amerikës, të cilët në çdo moment kanë qenë krah mbështetës në rrugëtimin tonë drejt Pavarësisë dhe si shtet, e që fatmirësisht si të tillë vazhdojnë të jenë.

Lavdi dëshmorëve të Kombit!

Urime 13 vjetori i Pavarësisë!