Ligjvënësit nga Partia AK në pushtet e Turqisë dhe Partia pro-kurde DEM, u grindën në asamblenë e përgjithshme të parlamentit të martën lidhur me ndalimin dhe zëvendësimin e një kryetari bashkie të Partisë DEM në juglindje tw Turqisë.
Të hënën, policia arrestoi Mehmet Siddik Akis, kryebashkiak i provincës juglindore të Hakarit në kufi me Iranin dhe Irakun, vetëm dy muaj pasi ai fitoi pushtetin në zgjedhjet lokale, transmeton Telegrafi.
Ministria e Brendshme e Turqisë tha se Akis luajti një rol të nivelit të lartë brenda milicisë së jashtëligjshme të Partisë së Punëtorëve të Kurdistanit (PKK), ndërsa e zëvendësoi atë me guvernatorin e shtetit.
Pas zgjedhjeve komunale të vitit 2019, Turqia arrestoi pothuajse të gjithë kryebashkiakët pro-kurdë për lidhje të dyshuara me PKK-në dhe i zëvendësoi me zyrtarë shtetërorë. DEM ka mohuar më parë çdo lidhje me PKK.
Tensionet u ndezën në parlament kur ligjvënësit e DEM-së mbajtën mbishkrime dhe brohoritën parulla, duke pushtuar podiumin e fjalimit në asamblenë e përgjithshme në shenjë proteste ndaj ndalimit dhe zëvendësimit të Akis.
“Krah për krah kundër fashizmit,” brohoritën ligjvënësit e DEM-it, ndërsa ligjvënësit nga Partia AK (AKP) e presidentit Recep Tayyip Erdogan brohorisnin kundërparrulla të tilla si “mallkuar PKK” ndërsa grisnin tabelat e mbajtura nga ligjvënësit e DEM.
Pamjet treguan ligjvënësit duke debatuar me zë të lartë dhe duke shtyrë njëri-tjetrin. Një grusht çoi në një përleshje që shkaktoi rrëzimin e disa ligjvënësve, ndërsa të tjerë u ndaluan të bashkoheshin në ‘luftë’.
Nuk ishte menjëherë e qartë se kush e dha grushtin e parë. Asambleja e Përgjithshme u mbyll një ditë pas incidentit. /Telegrafi/
