Megjithëse ekzekutivi në mbledhjen e kaluar ka marrë vendim që ta futë në agjendën legjislative për këtë vit Ligjin për Teatër, Ministria e Kulturës ende nuk ka nisur punë e amendamentimit të tij.
Ministri i Kulturës, Valton Beqiri, thotë se ata nuk kanë mundur të nisin punën e amendamentimit të ligjit pa aprovimin e qeverisë. Ai pohon se janë në përgatitje të grupit punues për amendamentim, dhe se ligji do të bëhet me standarde ndërkombëtare. Po ashtu bën të ditur se ligji tash e tutje do t’i definojë decidivisht kompetencat për teatrot se kush duhet t’i menaxhojë ata.
Por ai nuk është i sigurt se ky ligj do të mund të dërgohet këtë vit në Kuvend për miratim. Ministri shpreson së ligji do të përshpejtohet edhe nga qeveria, nga se ka të bëjë edhe me nisjen e implementimit të decentralizimit. /ktv/