Deputeti nga radhët e Partisë Demokratike të Kosovës, Reshat Qalaj, në një konferencë për media e potencoi faktin se projektligji për pagën minimale është i papranueshëm për PDK-në.
Kjo për faktin sepse sipas Qalajt, paga minimale prej 250 eurosh e prezantuar nga shumica parlamentare, nuk i mbulon as nevojat më bazike të qytetarëve të vendit.
“Projektligji për pagën minimale për Partinë Demokratike të Kosovës është i pa pranueshëm. Për shumë arsye. Fillimisht, me anë të këtij projektligji synohen të ndryshohen disa ligje pa ndonjë kriter, të caktuar. Qeveria e Kosovës e ka bërë një propozim në mënyrë arbitrare, duke u sjellur në mënyrë arrogante, që lartësia e pagës minimale të jetë 250 euro, mirëpo duke përjashtuar një kategori shumë të rëndësishme të vendit. Kjo pagë nuk i plotëson as për së afërmi nevojat e qytetarëve të Kosovës, duke pasur parasysh zhvillimet e fundit që kanë ndodhur në vend. Siç janë ngritja e çmimeve enorme, sidomos produketet bazike që i prekin drejtpërsëdrejti, qytetarin e Kosovës, ngritja e energjisë, e naftës etj. Vetëm ajrit ende nuk iu ka ngritë çmimi po besoj që këtë qytetarët e Kosovës nuk do ta lejojnë”, tha ai.
Deputeti Qalaj, tutje tha se në mënyrë të padrejtë nuk janë përfshirë në këtë projektligj, edhe veteranët dhe luftëtarët e UÇK-së.
“Nga ky ligj janë të përjashtuar edhe një kategori ndoshta më e rëndësishme e këtij vendi që janë, veteranët e dhe luftëtarët e UÇK-së. Në projektligjin aktual nuk janë të përfshirë veteranët dhe nuk do të jenë pjesë e beneficioneve, në lartësi të pagës minimale, me disa arsyetime qesharake. Siç është pritja që të bëhet kategorizimi i tyre dhe pastaj të futen në këtë skemë apo edhe për shkak të numrit të madh të veteranëve. A thua se veteranët nuk paskan bërë mjaftë për këtë shtet? Është e papranueshme që veteranët të lihen anash, ata që na e sollën lirinë dhe ne këtë ligj nuk do ta votojmë. Kërkojmë që të rritet shuma e pagës minimale, në 350 minimum. Përveç që nuk do ta votojmë, ne si PDK, do të përdorim të gjitha mjetet e mundshme për ta kundërshtuar këtë ligj që të mos kaloj”, deklaroi ai.
Pika e parë e rendit të ditës në seancën e sotme të Kuvendit është votimi në parim i Projektligjit nr.08/L-142 për ndryshimin dhe plotësimin e ligjeve që përcaktojnë shumën e beneficionit në lartësi të pagës minimale, procedurat e caktimit të pagës minimale dhe shkallët tatimore në të ardhurat personale vjetore. /Telegrafi/