Dy shqiptarë emrat e të cilëve nuk dihen ende, janë arrestuar në Nice të Francës, të dyshuar për lidhje të mundshme me terroristin i cili shkaktoi mbi 80 të vdekur.
Shqiptarët janë çift bashkëshortor dhe sipas medieve franceze, ata i kanë siguruar armë tunizianit i cili shkaktoi tragjedinë.
Lajmin për çiftin shqiptar e kanë pothuajse të gjitha mediat në Francë, por fillimisht ishte rrjeti francez medial, BMF TV, ai i cili pohoi se burri dhe gruaja shqiptare ia kishin siguruar Mohamed Lahouaiej Bouhlelit, pistoletën automatike 7.65 mm, me të cilën ai shtiu mbi Policinë, para se ata ta qëllonin atë për vdekje.
Pos çiftit, janë arrestuar edhe katër persona të tjerë, mbi të cilët ekziston dyshimi se kanë lidhje me sulmin në Nicë. Bashkë me ta, në arrest gjendet edhe vetë gruaja e sulmuesit.
Deri në momentin e incidentit, Buhlel ishte i panjohur për autoritet e inteligjencës franceze, por presidenti i vendit, François Holland, ka kërkuar nga hetuesit që të vërtetojnë nëse sulmuesi me origjinë nga Tunizia kishte lidhje me grupet ekstremiste.
Ai ka angazhuar 12 rezervistë të policisë, për të rritur sigurinë në Francë. Ndërkohë, një burim i afërt me hetimin i ka thënë agjencisë së lajmeve franceze të lajmeve AFP se vrasësi e kishte vizituar zonën në dy ditët e mëparshme për t’u përgatitur për sulmin.
Lidhur me këto dyshime, i ashtuquajturi Shteti Islamik, ka thënë se sulmuesi ishte duke vepruar në përgjigje të thirrjeve të tyre për të qëlluar civilët në vendet që janë pjesë e koalicionit anti-ISIS. Më shumë se 80 njerëz mbetën të vdekur nga sulmi në Francë.