Deputetja e Kuvendit të Kosovës nga radhët e boshnjakëve, Duda Balje ka reaguar sot pas miratimit në Qeverinë e Kosovës të tri marrëveshjeve nga Procesi i Berlinit, në kuadër të të cilave është lëvizja vetëm me letërnjoftim me Bosnjë dhe Hercegovinën.
Balje në një postim në Facebook shkruan se me padurim po pret që marrëveshja të votohet edhe në Kuvendin e Kosovës
“E kemi bërë hapin e parë, tani me padurim po pres ta votoj në Kuvendin e Kosovës!
Qeveria e Republikës së Kosovës ka miratuar marrëveshjen me Bosnjën dhe Hercegovinën për lëvizje të lirë vetëm me letërnjoftim.
Gjithashtu, janë miratuar edhe dy kontrata të tjera, ajo për njohjen e kualifikimeve të arsimit të lartë dhe ajo për njohjen e kualifikimeve profesionale të mjekëve, stomatologëve dhe arkitektëve”, shkruan Balje.
Ndryshe, të mërkurën ekzekutivi i dha dritë të gjelbër Projektligjit për ratifikimin e marrëveshjes për lëvizjen e lirë me letërnjoftime në Ballkanin Perëndimor.
Kabineti qeveritar miratoi edhe Projektligjin për ratifikimin e marrëveshjes për njohjen e kualifikimeve profesionale të mjekëve, stomatologëve dhe arkitektëve në kontekstin e marrëveshjes së Tregtisë së Lirë të Evropës Qendrore.
Ndryshe, tre marrëveshje thelbësore rajonale janë nënshkruar më 04.11.2022 në Berlin në kuadër të Samitit të Procesit të Berlinit, të cilat do ta thellojnë bashkëpunimin mes shteteve nga Ballkani Perëndimor.
Marrëveshjet e nënshkruara nga shefat e qeverive të vendeve të Ballkanit Perëndimor, kanë për qëllim integrimin rajonal dhe lëvizjen e lirë të qytetarëve të rajonit. /Telegrafi/
