VMRO-DPMNE dje ka përmendur Lëvizjen Besa si destabilizues dhe inkurajuese të LSDM-së për të destabilizuar Maqedoninë. Për këtë, Lëvizja Besa ka reaguar me një komunikatë të drejtuar Telegrafit në Maqedoni duke thënë ”Një parti që e solli vendin në këtë derexhe me këtë varfëri, që e largoi nga euro-integrimi, që shkaktoi kaq krime e manipulime, që bëri kaq abuzime me pushtetin, madje edhe vrasje dhe montime të proceseve gjyqësore, si “Monstra” e “Kumanova”, me çka e ka sjellë vendin buzë greminës, ka më së paku të drejtë ta akuzojë dikë për ndarje. ” thonë nga Lëvizja Besa.
Më tej Lëvizja Besa thotë ”RIDEFINIMI, sipas platformës së publikuar të Lëvizjes BESA qysh në mars të vitit të kaluar, nënkupton një RIDEFINIM të saktë të shtetit, në një marrëveshje shqiptare-maqedonase – pa e paragjykuar epilogun, ku shteti e shoqëria nuk do të jenë asimetrike siç janë sot, por ku shoqëria multietnike do të reflektohet edhe me shtet multietnik. Kjo, sipas nesh, është zgjidhja e vetme për Maqedoninë.” përfundon Lëvizja Besa./Telegrafi/