Partia opozitare shqiptare Lëvizja Besa, përmes një komunikate për media e akuzon BDI-në se është e paaftë për të mbrojtur punësimin e shqiptarëve në Agjencinë e Kadastrës.
Nga Lëvizja Besa thonë se qytetarë maqedonas janë paraqitur si shqiptarë, vetëm që të punësohen.
“Të nderuar qytetarë pas publikimit të emrave të përzgjedhur në konkursin e shpallur 402/2019 për punësimin e 23 administratorëve në Agjencinë për Kadastër të Patundshmërive, Lëvizja Besa kërkon anulimin e menjëhershëm të këtij konkursi, për arsye se është keqpërdor identiteti nacional dhe në vend se të zgjidhen kandidat shqiptarë ashtu siç është e theksuar në konkurs janë zgjedhur kandidat maqedonas”, thonë nga Lëvizja Besa.
Ata thonë se më skandaloze është që nuk janë zgjedh kandidatët për njësitë në Tetovë, Gostivar dhe Kërçovë dhe këshilltar shtetëror për çështje financiare që sipas tyre, ju takojnë shqiptarëve.
“Kjo edhe njëherë dëshmon paaftësinë e BDI-së kundrejt LSDM-së dhe rolin e tyre vazal, si dhe argumenton kërkesën e Lëvizjes Besa për futjen e grafës etnike në dokumentet identifikuese”, thonë nga Lëvizja Besa.