Këngëtarja e njohur shqiptare nga Maqedonia, Leonora Poloska, shënoi rikthimin e saj në muzikës pas një mungese disa vjeçare.
“S’ishte fat” titullohet kënga e saj më e re, e cila është baladë, tipike e stilit të Leonorës, me të cilën këngëtarja e ka “mësuar” tashmë publikun e saj.
Poloska në një bisedë për Telegrafin, ka folur rreth këtij rikthimi, i cili mesa duket do të jetë një ogur i mirë, që ajo mos të ndalet tani e tutje në aspektin e prurjeve të reja.
“Po, mbas gati shtatë viteve rikthehem me një baladë të Andin Randobravës, me tekst të Arsim Bunjakut dhe video-produksionin “Video Art”. I dedikohet dashurisë së humbur, ndaj shpresoj se publiku do ta mirëpresë. Por, nga tani e tutje do të ketë shumë projekte të reja, ju premtoj…bashkëpunime interesante e të tjera e të tjera”, ka thënë Leonora Poloska për Telegrafin.
E njohur për baladat e saj të veçanta dhe me tekste domethënëse – ky stil do të ishte i duhuri për rikthimin e Leonorës. Tutje, gjatë bisedës ajo tregon se e gjen veten më së miri në këtë zhanër, ndaj dhe e zgjodhi!
“Mund të them që po, sepse me balada ndihem më e sigurt”, tha tutje këngëtarja.
Mes klipeve të shumta me paraqitje ekstravagante e të ekzagjeruara që shohim te shumë prej artistëve të ditëve të soptme, Leonora ka zgjedhur diçka tjetër.
Ajo erdhi shumë e thjeshtë në videon e këngës, me vetëm një skenë të realizuar – ku thotë se ishte zgjedhaj e saj, pasi ajo dëshiron që muzika e saj të reflektojë te publiku dhe pamja vizuale të mos jetë asgjë më shumë se “interpretim prej shpirtit”.
“Po, më pëlqen të eksperimentoj, videoja u bë me qëllim e thjeshtë dhe vetëm me një skenë, me qëllimin e vetëm që ta përcjellë sa më mirë këngën…ishte koha të bëja diçka më ndryshe”, tha Poloska për Telegrafin.
Duke qenë se për të gjetur kompozitorin e këngës, ajo nuk duhet të “shkojë larg”, ngase e ka në shtëpi një të tillë, madje as më pak e as më shumë se bashkëshortin e saj, kompozitorin e njohur të shumë baladave, Andin Randrobrava.
Ajo tregon se puna me bashkëshortin e saj është edhe çelësi i suksesit tani më për të.
“Të bashkëpunosh me Andinin, burrin praktikisht, është shumë lehtë. Kemi mirëkuptim, s’kemi përplasje të autoriteteve, gjithçka shkon shumë butë”, ka deklaruar ajo.
Në përfundimin e bisedës për Telegrafin, Leonora Poloska nuk mund të mos i ndante emocionet e mëmësisë, pasi personi më i shtrenjtë i jetës së saj që është vajza, Andora, tashmë ndjehet krenare teksa rritet dhe sheh nënën e saj në ekran.
“Po, Andora po rritet dhe me endje më përcjell, i kam kënduar prej se ka lindur, në çdo rast të mundshëm…e kam bezdisur (qesh), nuk ka nga të ikë prej këngë”, ka treguar Leonora Poloska.
Këngëtarja tashmë rezidente e Prishtinës, pritet që edhe në vazhdimësi të jetë pranë publikut të saj me projekte të shumta muzikore. /Telegrafi/
