Los Angeles Lakers janë bërë skuadër e pandalshme në NBA, pasi kanë marrë edhe fitoren e katërt radhazi.
Skuadra nga Kalifornia ka triumfuar në udhëtim te Dallas Mavericks pas kohës shtesë me nëntë pikë epërsi 110:119.
Ishte një takim ku shkëlqeu LeBron James me ‘Triple-double’, ku shënoi 39 pikë, pati 12 kërcime e 16 asistime ndërsa pati edhe një bllokadë e katër topa të vjedhur.
Paraqitje të jashtëzakonshme kishte edhe Anthony Davis me 31 pikë, tetë kërcime, dy asistime, dy bllokada e dy topa të vjedhur.
Real recognize real. #LakeShow pic.twitter.com/XK8ItRMjvM
— Los Angeles Lakers (@Lakers) November 2, 2019
Tek vendasit i jashtëzakonshëm ishte Luka Doncic që gjithashtu arriti ‘Triple-double’, me 31 pikë, 13 kërcime e 15 asistim, por që në fund këto shifra vlejtën vetëm për statistika pasi nuk i mjaftuan për fitore.
Ndeshje jashtëzakonisht interesante është zhvilluar edhe në Barclays Center, ku Brooklyn Nets janë rikthyer te fitoret pasi kanë mposhtur Houston Rockets me shtatë pikë diferencë 123:116.
Taurean Prince ishte basketbollisti më efikas te vendasit me 27 pikë e 12 kërcime, ndërsa u ndihmua nga LeVert me 25 pikë e Irving me 22 të tjera në fitoren e Nets.
Ndërkohë mysafirëve nga Houstoni nuk i mjaftuan 36 pikët nga James Harden për të arritur fitore. /Telegrafi/
Rezultatet:
Brooklyn Nets – Houston Rockets 123:116
Indiana Pacers – Cleveland Cavaliers 102:95
Orlando Magic – Milwaukee Bucks 91:123
Boston Celtics – New York Knicks 104:102
Chicago Bulls – Detroit Pistons 112:106
Dallas Mavericks – LA Lakers 110:119
Sacramento Kings – Utah Jazz 102:101
Golden State Warriors – San Antonio Spurs 110:127
