Projekti i ri nga Majk dhe Onat, “Le t’Xhelozojnë” tashmë është pëlqyer nga fansat e Babastars qysh në orët e para të lansimit.
Dhe më shumë se fansave të Babastars, ky projekt mund t’u ketë pëlqyer ish-fansave të grupit TDS.
Dikur hip hop grupi që njihej për repin kualitativ ‘new school’ që kultivonin në skenën e muzikës shqiptare, me kohën u shpërnda, me Onatin që vazhdoi rrugën prej reperi me tekste të rënda dhe thumba prej më të ndryshmeve, por me Majkun që në anën tjetër i hyri një rruge krejt tjetër, shkruan Telegrafi.
Majku dy vitet e fundit ndërroi qasjen ndaj skenës muzikore, duke lënë për një kohë hip hopin dhe duke iu përvjelë këndimit, me një stil të ngjashëm si Maitre Gims.
Hit pas hiti, ndihmuar nga Getoar Selimi, Majk arriti një status fenomenal në skenën e muzikës, me koncerte pa fund dhe me një status tej mase të përmirësuar financiar.
Aq larg shkoi sensacioni i Majkut si këngëtar, sa që edhe mediat e quanin “këngëtari i Babastars”, e jo më “reperi i Babastars”.
Në rrjetet sociale gjithmonë shfaqej si hip hop artist, me stil jete të tillë, por këngët për dashurinë dhe baladat në anën tjetër ishin ana e ëmbël që e katapultuan atë drejt piedestalit, drejt parave.
Megjithatë, reperit po i flen hip hopi dhe këtë e tregoi në këngën “Le t’Xhelozojnë”.
Në një tekst plot thumba dhe me rrima shumë interesante, Majk shfaqet si një reper, duke ju kthyer dashurisë së vjetër, dashurisë të cilës i besoi por që nuk i solli statusin që e ka sot. Por, ai nuk e harroi dhe i është kthyer sërish dashurisë së parë, hip hopit.
Dhe publiku vetëm mund të shijojë pjesën e mbetur të vitit, pasi nga Majk nuk i dihet mund të presim edhe projekte të tjera të vërteta hip hopi, tash që e ka tejkaluar nevojën për të krijuar hite të pastra komerciale. /Telegrafi/
