Lidhja Demokratike e Kosovës(LDK) në Prizren, ka formuar një ekip për të negociuar me dy kandidatët që janë në garë në balotazh për kryetar të Prizrenit, Shaqir Totaj dhe Mytaher Haskuka.
Ekipi përbëhet prej katër anëtarëve të Kryesisë së LDK-së në Prizren.
Në mesin e tyre është edhe kandidati për kryetar të Prizrenit, Hatim Baxhaku.
Burimet e sigurta të “PrizrenPress”-it bëjnë të ditur se ekipi negociues fillimisht do të bisedojë me kandidatin e VV-së Mytaher Haskuka.
“Do të bisedojmë me Vetëvendosjen për të parë se cila është oferta e tyre.Pastaj do të analizojmë dhe diskutojmë për të marrë një vendim”, tregon burimi brenda LDK-së në Prizren.
Anëtarët e Kryesisë së LDK-së, nuk kanë vendosë vija të kuqe për kandidatin e PDK-së, Shaqir Totaj.
Sipas të njëjtit burim, nuk ka pasur kundërshtime në mbledhje që të negociohet edhe me PDK-në.
“Nuk ka pasur kundërshtime që të bisedohet edhe me PDK-në. Me PDK-në do të bisedojmë pasi që t’i shtjerrim bisedimet me Vetëvendosjen”, tregon burimi.
Kandidati i PDK-së për kryetar të Prizrenit, Shaqir Totaj dhe ai i Vetëvendosjes, Mytaher Haskuka, në zgjedhjet e 22 tetorit kanë mbetur në balotazh.
Ata do të përballen me 19 nëntor.
Totaj dhe Haskuka kanë kërkuar mbështetje nga partitë që kanë mbetur jashtë garës.