Lidhja Demokratike e Kosovës (LDK) ka akuzuar Komunën e Prishtinës për mospastrimin e rrugëve nga bora.
LDK përmes një njoftimi për media ka thënë se rrugët në zonat rurale janë të bllokuara nga ortekët e borës.
“Mëngjesi i datës 6 janar e zuri Komunën e Prishtinës me 60% e rrugëve të bllokuara – të pa pastruara. Veçanërisht rrugët rurale në zonat e thella janë të bllokuara nga ortekët dhe sasia e borës e makineritë e ndërmarrjeve të kontraktura nga Komuna po lëvizin shumë ngadalë.
Po ashtu, asnjë metër gjatësi trotuar nuk u pastrua dhe kjo dëshmon se retorika e premtimeve të dikurshme të Kryetarit të sotëm të Komunës së Prishtinës ishte vetëm për konsum politik, sa për të marrë votat që i nevojiteshin, sepse po shihet se ato premtime nuk po realizohen fare dhe se edhe kësaj qeverie komunale po i mungon shkopi magjik për të zgjidhur problemet ditore dhe të përhershme me të cilat ballafaqohet komuna”, thuhet në njoftim.
LDK më tej ka theksuar se sipas standardeve për pastrimin e borës kompanitë duhet të punojnë non-stop gjatë tërë natës nën mbikëqyrjen e stafit komunal dhe mbikëqyrjes komunale, por kjo nuk po ndodh!?
“Grupi i Këshilltarëve të LDK-së në Kuvendin e Komunës së Prishtinës, kërkon nga qytetarët e Komunës së Prishtinës që të jenë vigjilent dhe të kujdesshëm në pastrimin e borës para shtëpive të tyre, të angazhohen në pastrimin e rrugëve nëpër lagjet e tyre në mënyrë që të mundësohet qarkullimi normal i këmbësorëve dhe makinave qarkulluese. Po ashtu, kërkon nga qytetarët që të pajisen me pajisjet e nevojshme për qarkullim në komunikacion, pasi që kushtet e lëvizjes janë të tilla dhe me këtë komuna nuk po luan rolin e vet për krijimin e kushteve, për lirin dhe lëvizjen e qytetarëve në këtë situatë gati emergjente”, thuhet ne njoftim./Telegrafi/