Lidhja Demokratike e Kosovës po kërkon qasje më proaktive dhe përgatitje serioze të qeverisë së Kosovës karshi dialogut e jo të përgjigjet në kërkesa dhe tema që servohen nga të tjerët.
Anëtarja e kryesisë së LDK-së, Teuta Sahatqija kërkoi nga Qeveria që në mënyrë shumë aktive të vendosë për agjendën, parimet dhe mënyrën se si të vazhdojë dialogun me Serbinë.
“Qeveria Kurti duhet sa më parë të përgatit parimet mbi bazën e të cilave duhet të bëhet dialogu. Qeveria duhet t’i ketë këto parime të aprovuara nga Kuvendi i Kosovës, Qeveria këtë nuk e ka bërë dhe kjo hap rrugë spekulimeve të tilla si ato me “non-papers”. Presim nga institucionet që të kundërshtojnë fuqishëm këto “non-paper” e jo të heshtin karshi këtyre temave ”, tha ajo.
Ajo tha se “këto letra fuqishëm duhet të kundërshtohen nga çdo institucion i Kosovës. Ne mendojmë që Kosova duhet të ketë një rol shumë më proaktiv, jo të përgjigjet në kërkesa apo tema të cilat i servohen, por në mënyrë shumë aktive të vendos për agjendën, për parimet dhe mënyrën se si vazhdon dialogu”
Sahatçiu kërkon që kryeministri Kurti të jetë më transparent për procesin e dialogut dhe të vendos parimet bazë e që janë ruajtja e kushtetutshmërisë dhe sovranitetit të Kosovës.
“Dialogu duhet të jetë me Kosovën, e jo për Kosovën. Dialogu me Kosovën është dialog i partnerëve të barabartë që sjell paqe e stabilitet në rajon. Kosova ka dal nga një dialog dhe ka bërë kompromise të dhimshme për të fituar pavarësinë e saj dhe asnjë dialog nuk mund të diskutoj për statusin e saj që është i pacenueshëm. Sa i përket qasjes së Qeverisë Kurti përballë dialogut, përsërisim që transparenca duhet të jetë bazë për zhvillimin se si do të jetë procesi i dialogut dhe kryeministri duhet të raporton rregullisht para se të shkon në vizitë dhe pasi të kthehet prej vizitave, të informon institucionin më të lartë shtetëror, Kuvendin e Kosovës dhe të përgjigjet në pyetjet e deputetëve”, theksoi Sahatçiu gjatë konferencës për medie. /Telegrafi/