Ministri i Shëndetësisë, Rifat Latifi, është takuar sot me ambasadoren e parë të Izraelit në Kosovë, Tamar Ziv, me ç’rast kanë biseduar rreth bashkëpunimit mes dy vendeve në sektorin e shëndetësisë.
Në një komunikatë për media bëhet e ditur se ministri Latifi tha se është i nderuar për vizitën e ambasadores, e para e këtij niveli në Kosovë, posaçërisht duke e pasur parasysh se Izraeli ka një sistem shëndetësor tejet të zhvilluar prej të cilit mund të mësohet shumë.
Latifi përmendi shtatë shtyllat e programit të tij për transformimin e shëndetësisë së Kosovës, duke potencuar se shëndetësia është prioritet për Qeverinë e Kosovës.
Sipas komunikatës, ai ka vënë në pah edhe nevojën për krijimin e Qendrave të Ekselencës dhe në këtë pikë edhe Qendrën e Traumës e cila është shumë e domosdoshme për sistemin shëndetësor të Kosovës. Bashkëpunimi në këtë pikë, vlerësoi ai, është shumë i dobishëm pasi që Izraeli këtë Qendër e ka më të avancuarën në botë.
Latifi dhe Ziv u pajtuan se një nga fushat e tjera potenciale të bashkëpunimit është edhe digjitalizimi i sistemit shëndetësor kosovar.
Në këtë takim u bisedua edhe për mundësinë e trajnimit të stafit shëndetësor kosovar nga ekspertët shëndetësorë të Izraelit, në ato profile ku mungon ekspertiza.
Ndërkaq bëhet e ditur se ambasadorja izrealite, Tamar Ziv, ka thënë se shteti i saj është i gatshëm për të bashkëpunuar dhe ndihmuar Kosovën në mënyra të ndryshme për përmirësimin e shërbimeve të kujdesit shëndetësor dhe avancimit të fushave specifike, dhe për këtë qëllim ajo njoftoi se tashmë ka filluar përgatitjet për organizimin e vizitës së Latifit në Izrael gjatë këtij viti. /Telegrafi/
