Për Adriatik Lapajn, bashkimi i votave për miratimin e ndryshimeve në kodin zgjedhor, ishte pika kyçe që tregoi edhe njëherë se Sali Berisha dhe Edi Rama janë bashkë.
Në Debat në A2 CNN, Lapaj u shpreh se opozita kishte në dorë dy vendime të Gjykatës Kushtetuese që duhet të adresoheshin në Kodin Zgjedhor dhe mund ta kthente këtë gjë në mjet presioni për të kërkuar përmbushjen e disa kushteve të saj, gjë që nuk e bëri.
Sipas tij, deputetët e opozitës zyrtare bashkuan votat me Ramën, me shpresën e vetme për të kapur një vend në parlamentin e ardhshëm.
“A u bën bashkë dhe votuan të mbajnë të mbyllur kodin zgjedhor? E di ku u binda unë se ata janë bashkë. Sepse kishte dy vendime të Gjykatës Kushtetuese. Një ishte për hapjen e listës dhe tjetra për votën e diasporës. Mazhoranca nuk shkonte dot në zgjedhje pa i adresuar këto dy vendime pasi në çdo rast zgjedhjet do të ishin antikushtetuese,” tha Lapaj.
“Opozita kishte në dorë një fishek vrasës. Mazhoranca nuk i adresonte dot pa votën e opozitës. Mund të vinte kushte për rikthimin e koalicioneve. Për të kapur ndonjë vend deputeti këta që janë rreshtuar te opozita zyrtare, bashkuan votat me Ramën. Ai shumë finok dhe i zgjuar tha se ke listat e mbyllura do të fusë të rinjtë, po a e bëjnë këta dot këtë”, tha Lapaj.