Ambasada britanike në Kosovë ka vlerësuar sot se komunikimi efektiv është thelbësor në luftimin e dezinformimit dhe keqinformimit.
Ambasada në një postim në Facebook thekson se që nga viti 2022, përmes partneritetit me Shërbimin Ndërkombëtar të Komunikimit të Qeverisë së Mbretërisë së Bashkuar (GCSI), kanë mbështetur Qeverinë e Kosovës në forcimin e përpjekjeve të saj strategjike të komunikimit.
“Si një moment kyç në këtë bashkëpunim, ne jemi krenarë të lansojmë Manualin e Komunikimeve të Qeverisë – një udhëzues gjithëpërfshirës që konsolidon të gjithë trajnimin dhe ekspertizën e ndarë gjatë dy viteve e gjysmë të fundit. Ky manual i qëndrueshëm do të shërbejë si një burim jetik për të siguruar komunikim të qëndrueshëm, efektiv dhe transparent në të gjithë qeverinë për vitet në vijim”, thuhet në njoftim. /Telegrafi/
