Huawei njoftoi telefonat inteligjentë Mate 30 dhe Mate 30 Pro në shtator në një ngjarje të veçantë në Mynih.
Gjigandi i teknologjisë kineze i mahniti të gjithë me sasinë e teknologjisë dhe inovacionit brenda telefonave, por, përveç zbulimit të çmimeve në Euro, nuk kishte detaje të sakta të disponueshmërisë për tregjet evropiane.
Kompania po përpiqej, ndoshta, të fshihte detaje në lidhje me transportuesit dhe shitësit me pakicë, duke pasur parasysh status quo-në e Huawei-t, që lanson telefonin e saj të parë premium pa mbështetjen zyrtare të Google, transmeton Telegrafi.
Sipas një raporti të fundit, duke cituar “burime të mirë-informuara me bazë në Kinë”, lansimi i Mate 30 dhe Mate 30 Pro evropian duhet të ndodhë në mes të nëntorit, ndoshta 15 nëntor.
Ndërsa tregjet e sakta nuk u përmendën, raporti sugjeron vendet që zakonisht janë tregjet fillestare, përfshirë Gjermaninë, Francën, Spanjën, Italinë, Britaninë e Madhe dhe Zvicrën.
Raporti spekulon se Mate X i palosshëm, i cili tashmë është në dispozicion në Kinë, mund të mos nisë në të njëjtën kohë.
Sa i përket Mate 30 dhe Mate 30 Pro, çmimi, siç u njoftua, fillon me 799€ për Mate 30, vazhdon me 1,099€ për Mate 30 Pro, dhe shkon deri në 1,199 € për Mate 30 Pro 5G. /Telegrafi/