Los Angelos Lakers janë rikthyer te fitorja në NBA pas asaj disfate nga San Antonio Spurs një ditë më parë.
Përkundër mungesës së theksuar të dy yjeve Anthony Davis e Caldwell-Pope, Lakers arritën fitore në shtëpi përballë Chicago Bulls me rezultat të ngushtë 117:115.
Ishte një ndeshje shumë interesante dhe e paparashikueshme deri në fundin e saj pasi të dyja skuadrat krijonin epërsi të vogël dhe pastaj gjithçka barazohej.
Gjithsesi më meritori për fitoren e kampionit në fuqi ishte LeBron James që shënoi 28 pikë, pati shtatë kërcime e shtatë asistime.
Me lojë të mirë u dalluan edhe fundori gjerman Dennis Schroder si dhe qendra Harell që shtuan nga 17 pikë, ndërsa edhe Wesley Matthews e Markief Morris e përfunduan takimin me pikë dyshifrore.
Zach LaVine ishte më efikasi te mysafirët me 38 pikë, por që nuk mjaftuan për të shkaktuar befasi në Staples Center.
Por befasia ndodhi në Chase Center të San Franciscos, ku Golden State Warriors kanë mposhtur Los Angelos Clippers me 10 pikë diferencë 115:105.
Të udhëhequr nga fundori fantastik Steph Curry, Warriors kanë marrë fitoren e pestë këtë edicion.
Curry e mbylli takimin me dyshifror të dyfishtë ku shënoi 38 pikë dhe pati 11 asistime, ndërsa u ndihmua edhe nga Andrew Wiggins që e mbylli ndeshjen me 16 pikë.
Paul George me 25 pikë e Kawhi Leonard me 24 të tjera ishin më efikasit tek mysafirët, por që në fund nuk mjaftuan për tu larguar me fitore nga Chase Center. /Telegrafi/
Rezultatet:
Detroit Pistons – Phoenix Suns 110:105
Boston Celtics – Washington Wizards 116:107
New York Knicks – Oklahoma City Thunder 89:101
New Orleans Pelicans – Charlotte Hornets 110:118
Houston Rockets – Orlando Magic 132:90
Memphis Grizzlies – Brooklyn Nets 115:110
Milwaukee Bucks – Utah Jazz 118:131
Golden State Warriors – LA Clippers 115:105
LA Lakers – Chicago Bulls 117:115
Sacramento Kings – Toronto Raptors 123:144