Banorët në lagjen Fidanishte të Pejës, tash e një vit po përballen me kundërmim që vjen nga kontejnerët me mbeturina pranë banesave të tyre.
Banorët thonë se po kanë problem ngase ato mbeturina po grumbullohen nga të tjerët që nuk janë të kësaj lagje.
Xhevdet Muriqi banor ka thënë se problemin e kanë adresuar edhe në Komunën e Pejës, e së fundmi edhe në Polici.
“Problemi është se banorët e lagjes nuk po mundim as në ballkone me dalë për shkak të erës së rëndë që vjen nga kontejnerët. Është problem i madh se tash është vera dhe na gjuajnë mbeturina të ndryshme, material ndërtimor, mbeturina kafshësh etj.”, shprehet i shqetësuar banori Muriqi.
Në anën tjetër shefi i zyrës së kryetarit Gazmend Muhaxheri, Durim Sheremeti ka thënë për RTV Dukagjinin se është në dijeni për këtë çështje dhe që shumë shpejtë do intervenojnë në bashkëpunim me kompaninë Ambienti.
“Fillimisht kemi intervenuar dhe kemi dyfishuar fuqinë punëtore për të pastruar ambientin dy herë në dite, por edhe ajo zgjidhje tashmë është tejkaluar dhe janë paraqitur nevoja të reja. Besojmë se së shpejti banorët e kullave në Fidanishte do të kenë kontejnerë të personalizuar, në mënyrë që të mos kemi një kontejnerë të përbashkët sepse kemi informata që edhe banorë të lagjeve tjera po i hedhin aty mbeturinat”, shprehet më tej Sheremeti.
Banorët po ashtu kanë bërë një peticion që këta kontejnerë të largohen nga ky vend për tu zëvendësuar me disa kontejnerë më të vegjël për secilën kullë përkatëse./Telegrafi/
