Në prag të çeljes së samitit të 20 vendeve më të industrializuara të globit, Fondi Monetar Ndërkombëtar ka publikuar një dokument të nënshkruar nga Christine Lagarde me titull: Ruajtja e vrullit të ekonomisë globale.
Institucioni thekson se duhet pasur shumë kujdes ndaj rritjes së vështirë ekonomike si dhe ndaj rreziqeve që burojnë nga politikat proteksioniste të Donald Trump.
Fondi Monetar Ndërkombëtar përgatit kështu terrenin e debatit për datat 17 dhe 18 Mars kur do të takohen ministrat e financave dhe guvernatorët e bankave qendrore të vendeve të G20-ës.
20 të fortët e globit do të takohen në Gjermani. Sipas institucionit me bazë në Washington, rritja ekonomike globale do të përshpejtohet në terma afat-mesëm, por se nga ana tjetër ka shumë pasiguri dhe rreziqe.
“Masat proteksioniste duhen shmangur”, deklaron Fondi, “pasi dëmtojnë rritjen ekonomike, mirëqenien dhe rezistencën apo fleksibilitetin ekonomik. Kemi prekur pikën e kthesës dhe po lëvizim drejt pozitave më të favorshme, por do të ishte gabim që kjo të përkthehej automatikisht në shëndet të mirë“-thotë Christine Lagarde.
“Si rrallëherë, zgjedhjet politike në këtë moment janë mjaft të rëndësishme për atë që do të vijë më pas, sidomos tani që ka ende rreziqe domethënëse për të ardhmen dhe projeksionet“-shton numri një i Fondit Monetar Ndërkombëtar.
Ndër të tjera FMN i bën apel bankës Qendrore Europiane të ruajë politikat monetare ultra-lehtësuese si dhe Rezervës Federale që të shtrëngojë gradualisht rubinetin. /Telegrafi/