Pasi u konfirmua nga ushtruesi i drejtorit të Institutit të Mjekësisë Ligjore (IML), Ditor Haliti se është pezulluar procesi i akreditimit të laboratorit të Toksikologjisë, për shkak të situatës së krijuar pas zhdukjes së mostrave të rastit Dehari, nga Drejtoria e Përgjithshme e Akreditimit e Kosovës (DAK) thonë se ky laborator pas aplikimit për akreditim ka bërë kërkesë për anulim të aplikimit.
Në një përgjigje dërguar Telegrafit, nga DAK kanë bërë të ditur se nuk e kanë akredituar Laboratorin e Toksikologjisë, kjo pasi “ky laborator pas aplikimit për akreditim ka bërë kërkesë për anulim të aplikimit”.
“Drejtoria e Përgjithshme e Akreditimit e Kosovës (DAK) nuk e ka akredituar Laboratorin e Toksikologjisë. Arsyeja e mos akreditimit të këtij laboratori është se ky laborator pas aplikimit për akreditim ka bërë kërkesë për anulim të aplikimit”, thonë për Telegrafin nga DAK.
Po ashtu, në përgjigjen dërguar Telegrafin thuhet se “nëse në të ardhmen ky laborator bën kërkesë për të vazhduar me proces të akreditimit, DAK do të vazhdojë me hapat e mëtutjeshëm të prezantuar në Procedurën e Akreditimit DAK-PT-01”.
Ndryshe, laboratori i toksikologjisë i cili është brenda Institutit të Mjekësisë Ligjore (IML) funksionin që nga viti 2006, në të cilën kryhen analiza kuantitative dhe kualitative të alkoolit. Ndërsa, analizat kuantitative të substancave narkotike dhe medikamenteve mjekësore nuk kryhen në këtë laborator për rastet e autopsisë në këtë institut.
Analizat e kryera në laboratorin e toksikologjisë janë të një rëndësie të veçantë, pasi shërbejnë si dëshmi për rastet e ndryshme të veprave penale në procese gjyqësore.
Telegrafi do t’ju mbaj të informuar rreth të gjitha zhvillimeve në Institutin e Mjekësisë Ligjore (IML). /Telegrafi/