“Ky është Dritëroi im”, është titulli i librit më të ri kushtuar Dritëro Agollit, i cili del në dritën e botimit në një situatë të vështirë të krijuar nga pandemia Covid -19, siç njofton e bija e shkrimtarit Elona Agolli. Ajo shprehet se projekti për librin me kujtime “u la në mes” nga bashkëshortja e shkrimtarit të madh, Sadije Agolli, e cila ndërroi jetë në mënyrë të papritur një vit më parë.
Libri që sapo ka dalë në qarkullim nga Shtëpia Botuese “Dritëro” ka rreth 1000 faqe me kujtime dhe mbresa kushtuar për këtë personalitet të shquar të letrave shqipe.
Në librin “Ky është Dritëroi im” janë përfshirë plot 120 autorë. Mes tyre ka shkrimtarë dhe publicistë, personalitete të njohura të artit dhe të kulturës, të politikës e të shkencës, të botës akademike e personalitete nga fusha të ndryshme të jetës e veprimtarisë shoqërore.
Të gjithë kanë rrëfyer lirshëm dhe pa fshehur asgjë nga mënyra e sjelljes dhe e jetesës së shkrimtarit. Të gjithë shkruajnë atë që kanë parë e përjetuar për shkrimtarin dhe poetin e madh shqiptar.
“’Nuk do ta mbarojmë dot këtë libër. Vështirë më duket’, shpesh më përsëriste mami, kur të dyja bënim përmbledhjen e shkrimeve të dërguara apo faqet e redaktuara bashkërisht. Dhe, ndodhi që pa u përfunduar redaktimi , mami të ndahej nga jeta. Ajo parandjente diçka, ndjente që nuk do ta përfundonte këtë libër të nisur me aq pasion e këmbëngulje nga vetë ajo. Parandjente që thirrja e babit për t’u përafruar me të ishte shumë e fortë”, thotë Elona. “Shpesh e gjeja veten duke folur me zë të lartë: Do ta botoj librin e kujtimeve dhe do ta kushtoj ty mam”.
E, megjithatë libri doli. Kujtimet e rrëfenjat e bukura në librin vijnë si dëshmi të jetuara, duke gdhendur në kujtesën e lexuesit jo vetëm profilin e shkrimtarit të madh që mbeti aq njerëzor e zemërmadh deri në fund të jetës së tij. Kjo dëshmi e personalitetit të tij vjen në këtë libër nga Ismail dhe Helena Kadare, Rexhep Qosja, Moikom Zeqo, Zija Çela, Frrok Çupi, Teodor Keko, Ilir Meta, Pandeli Majko, Arben Malaj, Besnik Mustafaj, Preç Zogaj, Sabit Brokaj, Bardhyl Londo, Muntaz Dhrami, Ali Aliu, Margarita Xhepa, Diana Çuli, Natasha Lako, Shaban Sinani, Pëllumb Kulla, Visar Zhiti, Bujar Kapexhiu, Ekrem Bardha, Skënder Buçpapaj, Timo Flloko, Mevlan Shanaj, Luan M. Rama, Ardit Gjebrea, Zhani Ciko, Piro Milkani, Mimoza Ahmeti, Mentor e Shpëtim Nazarko, Petrit Ruka, Justina Aliaj, Lazër Stani etj. /Shqiptarja/