Deputetët kanë mbajtur një minutë heshtje pasi u mblodhën sot në Kuvendin e Kosovës, në nderim të legjendës së boksit shqiptar, Xhevdet Peci, i cili vdiq të hënën.
“Para se të fillojmë me seancën, edhe në konsultim me kryetarët e grupeve parlamentare, u dakorduam që ta mbajmë një minutë heshtje për legjendën e boksit shqiptar, Xhevdet Pecin”, ka thënë kryeparlamentari Glauk Konjufca.
Më pas deputetët u ngritën në këmbë për ta nderuar ish-boksierin e gjeneratës së artë të Prishtinës.
Xhevdet Peci u lind me 17 Prill 1955 në fshatin Zhazhë (asokohe pjesë e Komunës së Mitrovicës ndërsa tani pjesë e Komunës së Zveçanit).
Ai nisi të merret me boks në moshën 16-vjeçare në KB “Akumulatori” të Mitrovicës.
Në gjysmësezonin 1973/74 kaloi në KBx Prishtina. Në periudhën 1975-1983 i fitoi pesë tituj të kampionit të ish-Jugosllavisë në boks.
Është shpallur katër herë kampion i ish Jugosllavisë për kategorinë e rëndë, ndërsa i ka fituar edhe dy tituj të kampionit ballkanik.
Xhevdet Peci ka boksuar deri në vitin 1986.
‘Boksi i hekurt’ siç njihej në atë kohë ka ndërruar jetë në moshën 67 vjeçare në SHBA. /Telegrafi/