Ish-gazetarja televizive Yekaterina Duntsova është nominuar të kandidojë në zgjedhjet presidenciale ruse në mars, të cilat Vladimir Putin pritet t’i fitojë me shumicë.
Sipas mediave të huaja, përcjell Telegrafi, Duntsova, 40 vjeçe, bëri thirrje në një intervistë me Reuters muajin e kaluar për t’i dhënë fund konfliktit në Ukrainë dhe lirimin e të burgosurve politikë, përfshirë liderin e opozitës Alexei Navalny.
Dhe të mërkurën ajo dorëzoi dokumente tek zyrtarët në Komisionin Qendror të Zgjedhjeve për të hyrë zyrtarisht në zgjedhjet në të cilat fitorja e Putinit shihet gjerësisht si një përfundim i paramenduar nga mbështetësit dhe kundërshtarët.
Putin, 71 vjeç, ka qenë në pushtet si president ose kryeministër që nga viti 1999 dhe po kërkon një mandat tjetër gjashtëvjeçar.
Me Navalny duke vuajtur dënime me burg në total më shumë se 30 vjet dhe kritikë të tjerë kryesorë të Kremlinit ose pas hekurave ose jashtë vendit për shkak të rrezikut të arrestimit, nuk ka asnjë figurë të vendosur opozitare që ta sfidojë atë.
Mbështetësit e Navalny-t i quajnë zgjedhjet false, duke thënë se Kremlini kontrollon se kush mund të kandidojë dhe mund të manipulojë lehtësisht votimin nëse është e nevojshme.
Ndërsa Kremlini thotë se Putini do të fitojë sepse gëzon mbështetje dërrmuese të publikut, me vlerësime të sondazheve prej rreth 80%.
Ndërkohë bëhet e ditur se pengesa tjetër e Duntsovës do të jetë mbledhja e 300,000 nënshkrimeve në mbështetje të kandidaturës së saj nga e gjithë Rusia, me një afat kohor deri në 31 janar.
Putin njoftoi në fillim të këtij muaji se do të kandidonte, por asnjë kandidat tjetër nuk ka aplikuar zyrtarisht deri më tani. Ata që mbështeten nga një parti politike u duhen vetëm 100,000 nënshkrime. /Telegrafi/