Frank Lampard? Steven Gerrard? Xavi Hernandez? Edhe Arsene Wenger ka një yll në mesfushë dhe sipas francezit është Aaron Ramsey.
Tekniku francez i Arsenalit beson se rikthimi i mesfushorit të vet te goli po e bën atë një lojtar po aq të madh dhe të ngjashëm me legjendën e futbollit anglez, Lampard.
Ai ende duhet të shkruajë historinë e tij për këtë sezon, sepse ka vuajtur shumë nga dëmtimet, por Wenger ka shpresa të mëdha te 25-vjeçari.
“Ai e drejton dhe e shtyn skuadrën përpara dhe kjo është saktësisht ajo që neve na duhet. Ai është si Lampard. Atij i pëlqen t’i afrohet zonës dhe të gjuajë. Unë mendoj se ata kanë cilësi të ngjashme“, u shpreh strategu i “Topçinjve”.
Në vitet e fundit, lojtari i kombëtares së Uellsit ka ofruar më shumë rrezikshmëri pranë zonës kundërshtare, teksa në sezonet 2013-2014 dhe 2014-2015 golat e tij kanë qenë numra dyshifrorë.