Gjykata Speciale ka nisur sot me arrestimin e personave të dyshuar për krime lufte në Kosovë.
I arrestuari i parë nga kjo Gjykatë është Salih Mustafa, ish-eprori i UÇK-së në Zonën Operative të Llapit. Kjo është bërë e ditur nga Zyra e Prokurorit të Specializuar përmes një njoftimi për media.
“Salih MUSTAFA u arrestua sot në Kosovë nga Zyra e Prokurorit të Specializuar në bazë të një fletarrestimi, urdhri për transferim dhe aktakuzës së konfirmuar, të lëshuara nga një gjykatës i procedurës paraprake i Dhomave të specializuara të Kosovës”, thuhet në njoftimin e Speciales. Ai po transferohet në objektin e paraburgimit të Dhomave të specializuara të Kosovës në Hagë dhe do të dalë para gjykatësit të procedurës paraprake pa vonesë të papërligjur”, thuhet në njoftim.
Por kush është Salih Mustafa dhe cili ishte funksioni i tij në periudhën e luftës dhe pas saj në Kosovë?
Mustafa ka qenë pjesë e organizimit të Lëvizjes Kombëtare për Çlirim, që nga viti 1988, nën udhëheqjen e Afrim Zhitisë, Fahri Fazlisë e Fadil Vatës, shkruan KlanKosova.
Gjatë veprimtarisë ilegale, ai ishte arrestuar nga regjimi i Sllobodan Millosheviqit, në vitin 1993 dhe është dënuar me 5 vjet burgim për organizim të kryengritjes së armatosur.
Në gusht të vitit 1997, pasi përfundon dënimin me burgim, Mustafa ishte angazhuar për organizimin dhe shtrirjen e UÇK-së në rajonin e Prishtinës, Obiliqit, Gjilanit, Vitisë e Kamenicës.
Ka udhëhequr njësitet guerile të UÇK-së nën emrin guerilja BIA deri me themelimin e zonave operative të Llapit dhe Karadakut. /Telegrafi/