Shefja e Grupit Parlamentar të Lëvizjes Vetëvendosje, Mimoza Kusari-Lila, në seancën e Kuvendit të enjten derisa ka kundërshtuar themelimin e Komisionit Parlamentar Hetimor për rezervat shtetërore, ka thënë se Prokuroria Speciale për këtë çështje ka arrestuar “në mënyrë spektakulare” dy zyrtarë të Ministrisë së Industrisë, Ndërmarrësisë dhe Tregtisë si dhe një subjekt afarist.
E ndaj këtij deklarimi ka reaguar shefi i Grupit Parlamentar të Aleancës për Ardhmërinë e Kosovës, Besnik Tahiri, duke e cilësuar si “presion politik mbi prokurorinë”.
“Kërkesën për themelimin e Komisionit Hetimor Parlamentar për rezervat shtetërore e kemi nisur me qëllimin e vetëm për të parë më në detaje se cila ka qenë procedura për furnizimin dhe menaxhimin e rezervave shtetërore”, ka thënë Tahiri.
“Ne si grup parlamentar mendojmë se themelimi i këtij komisioni parlamentar është i drejt. Mimoza Kusari-Lila duhet ta dijë se pushtetet janë të ndara. Në momentin kur një shefe e grupit parlamentar thotë se prokuroria ka bërë spektakël, në fakt këtu është presioni politik mbi prokurorinë. Ku e di ajo se me cfarë spektakti ka shkuar prokuroria? Këtu politika ndërhyn në sistemin e drejtësisë”.
“E dyta, nëse pushtetet janë të ndara atëherë ne si Kuvend po duam ta trajtojmë edhe aspektin politik edhe aspektin ku gjyqësori nuk mund të shkojë. Ne po dojmë me pa këtë mega-skandal të një mashtrimi të madh me e pa në perspektivën politike. Se ju keni ardh në pushtet duke thënë se do të ndalet korrupsioni dhe keni folur se si ne i kemi shpenzuar rezervat shtetërore e kurrë nuk jeni ndalë. Tash ne duam të shohim se si i keni menaxhuar ju”. /Telegrafi/