Deputeti i Lëvizjes Vetëvendosje, Sami Kurteshi në interpelancën për vdekjen e dyshimtë të Astrit Deharit ka thënë se ish-ministrja e Drejtësisë, Dhurata Hoxha me fjalimin e saj e ka bindur se ka pasur dorë në vrasjen e Deharit.
Hoxha ka mbajtur përgjegjës kreun e Vetëvendosjes, Albin Kurti dhe këtë parti për vdekjen e Astrit Deharit..
“Sot u binda se Dhurata Hoxha ka gisht direkt në vrasjen e Astrit Deharit, pas fjalimit që mbajti sot”, ka thënë Kurteshi, duke aluduar në një fjalim të mëhershëm të Hoxhës mjaft të ashpër në raport me Vetëvendosjen dhe Albin Kurtin.
Kurteshi ka shtuar se janë bërë ndërhyrje të drejtpërdrejta nga drejtësia në hetimet në rastin Dehari.
“Astrit Dehari ka vdekur i pafajshëm në burg, a e ka mbytur dikush apo ka bërë vetëvrasje duhet të dihet por ai ka vdekur në duart e shtetit. Vetëm një hetim ndërkombëtar që do të tregonte se kush është fajtor do të sillte drejtësi në këtë vend. Kjo drejtësi është duke vdekur sepse e keni ngulfatur”, ka thënë Kurteshi.