Sot, Prishtina ishte nikoqire e mbledhjes së anëtarëve të Unioni i Bashkive Shqiptare në Rajon, në të cilën u mirëpritën Kryetarët dhe përfaqësuesit e drejtorive përkatëse të Komunave dhe Bashkive anëtare të Unionit.
Kryetari i Prishtinës, Përparim Rama përmes një shënimi në Facebook ka dhënë detaje për temat që u biseduan në këtë takim.
Ai ka thënë se nën moton “Kurorat e Qyteteve Shqipfolëse si Destinacion i Agroturizmit”, u diskutua për mundësitë e bashkëpunimit të ndërsjellë në këtë drejtim.
“Projekte të shumta janë realizuar deri më tani në kuadër të UBShR-së, dhe shumë të tjera presin realizimin në të ardhmen e afërt, për të cilat u zotuam së bashku në këtë takim”, shtoi Rama.
“Të mirat që ofron natyra janë të pazëvendësueshme për shëndetin fizik e mendor të qytetarëve tanë. Andaj, çfarëdo lloj investimi që e ruan, promovon dhe e sjell natyrën më afër nesh, e që vepron në harmoni të plotë pa e dëmtuar atë është vlerë e shtuar shoqërore për të gjitha trevat shqipfolëse kudo”, vijoi tutje Rama.
I pari i kryeqytetit ka thënë se mirëpresin bashkëpunimin e vazhdueshëm për të mirën e qyteteve tona./Telegrafi/
