Poezi nga: John Yamrus
Përktheu; Fadil Bajraj
në dhomën e pritjes
te dentistI
ishte sall një
vend i lirë
e zura,
mora një kopje të Newsweek-ut
dhe u përpoqa
të fshihja fytyrën time.
ama,
bile edhe para
se të hapja revistën
njëfarë tipi në anën time të djathtë
përkulet
dhe fillon të flasë.
“… dikur i kam ra kitarës …
para shumë vitesh,
kur isha kalama.
i bija për bukuri, përnjëmend!”
duke e ditur se ishte e kotë
e hodha revistën
dhe u ktheva drejt tij.
ai ishte
një tip i zakonshëm …
ndoshta 50 vjeç.
“ishte një
mënyrë e shkëlqyer
për të kapur femra.
kam takuar
turlifarë femrash
kur i bija kitarës.
njashtu takova
gruan time.”
bash atëherë
ma thirrën emrin
dhe u ngrita në këmbë.
ai mori
revistën time
dhe tha:
“qebesa,
kanë kaluar do vite
ç’prej se i kam ra kitarës…
tash
po i bie
fyellit.”