50 për qind e konsumatorëve të Ujësjellësit Rajonal “Prishtina” të cilët janë banorë të kryeqytetit, nuk do të kenë ujë 24 orë as kur të ndërtohet fabrika e ujit në Shkabaj.
Kështu tha ish-kryeshefi ekzekutiv i K.U.R.P, Skënder Bublaku, në emisionin “Ju flet Prishtina”, që transmetohet në Klan Kosova.
Bublaku tha se ”fabrika e ujit në Shkabaj pa zgjerimin e pompave të ujit nuk do të jetë i dobishme për një pjesë të madhe të qytetarëve të Prishtinës”.
Ai tha se arsye për këtë është mos zgjerimi i stacionit të pompave i cili ndodhet në Parkun e Qytetit në Prishtinë.
Sipas tij, aktualisht ky stacionin nga liqeni transporton ujë vetëm 200 litra në sekondë, e për të pasur ujë 24 orë do duhej të bartë ujë 400 deri 450 litra në sekondë në lagjet e kryeqytetit, si “Bregu i Diellit”, “Mati 1,2,3” e në lagjen “Prishtina e Re”.
Kur të ndërtohet fabrika e ujit në Shkabaj nga liqeni do vinë rreth 1500 litra ujë në sekondë, e stacioni i pompave të ujit në parkun e qytetit aktualisht mund të bartë vetëm 200 litra ujë.
Zgjerimi i tij nuk ka filluar ende, ndonëse projekti sipas Bublakut ekziston. Zgjerimi i këtij stacioni do kushtonte nga 3-5 milionë euro dhe mund të zgjasë deri në dy vite.