Ministrat e Punëve të Jashtme të BE-së sot pasdite në Luksemburg u dakorduan që vendet anëtare të BE-së do të bisedojnë më së voni deri në tetor të vitit 2019 për hapjen e bisedimeve me Maqedoninë e Veriut dhe Shqipërinë.
Ky version shënon ndryshime të vogla, si përshëndetja e Marrëveshjes së Prespës, ku insistuan mbështetësit e Maqedonisë së Veriut në Këshill, si element që vendos dallim të vogël në krahasim me konkluzionin për Shqipërinë, përcjell Telegrafi Maqedoni.
Megjithatë, vendet anëtare nuk arrijnë të dakordohen për datën e nisjes së bisedime dhe përsëri premtojnë se do ta bisedojnë këtë çështje deri në fund të këtij viti.
“Duke vërtetuar konkludimet nga 26 qershori i vitit 2018, Këshilli fuqishëm e përshëndet marrëveshjen historike të Prespës dhe e merr parasysh rekomandimin e Komisionit Evropian për hapjen e bisedimeve me Republikën e Maqedonisë së Veriut në bazë të vlerësimit pozitiv dhe progresit të bërë. Duke marrë parasysh kohën e kufizuar dhe rëndësinë e kësaj çështje, Këshilli do të hap këtë çështje jo më vonë se në tetor të vitit 2019”, shkruan versioni i fundit i konkluzionit për Maqedoninë e Veriut.
Me përjashtim të Marrëveshjes së Prespës, edhe konkludimi për Shqipërinë është gati i njëjtë ndërsa vendet e Evropës lindore janë angazhuar për hapjen e bisedimeve për të dy vendet pa asnjë anulim, por rezistenca e Francës, Gjermanisë dhe vendeve tjera mbetet e madhe./Telegrafi/