Gazeta franceze, “Le Matin”, ka botuar të dielën e 9 prillit 1939, në faqen e tretë deklaratën e sekretarit amerikan të Shtetit, Cordell Hull, në lidhje me pushtimin e Shqipërisë nga Italia fashiste.
Hull, i mbështetur plotësisht nga presidenti Franklin D. Roosevelt, e shihte këtë pushtim si një rrezik tepër të madh për paqen botërore. Prandaj, qeveritarët e lartë amerikanë janë mbledhur asokohe për hartuar një plan me qëllim për të ndëshkuar Italinë fashiste.
Cili ka qenë ky plan? Çfarë përmban deklarata e Sekretarit të Shtetit Amerikan?
Në vijim do të gjeni shkrimin e plotë të sjellë në shqip nga Blogu “Dars (Klos), Mat – Albania”:
“Washington, 8 prill. (Dép. Havas).
Z. Cordell Hull, pas një bisede telefonike me presidentin Roosevelt, ka dhënë këtë deklaratë për shtyp:
‘Pushtimi i dhunshëm i Shqipërisë është padyshim një kërcënim shtesë për paqen në botë. Pushtimi bie në kundërshtim me vullnetin e të gjithë popujve për të parë qeveritë e tyre t’i udhëheqin në udhën e paqes dhe jo atë të luftës. Është e panevojshme të shtojmë se efekti i pashmangshëm i kësaj ngjarjeje, që vjen pas disa të ngjashmëve, ka për qëllim të shkatërrojë besimin dhe të minojë stabilitetin botëror. Kjo do të ndikojë edhe në vetë mirëqenien tonë.’
Z. Hull shprehu mendimin se Italia ka shkelur Paktin Kellogg. Ai ndër të tjera tha se embargoja e armëve kundër Italisë në bazë të aktit të neutralitetit po diskutohej nga zyrtarë të lartë qeveritarë.
Presidenti Roosevelt, gjatë një konference për shtyp në Warm Springs tha se ai mbështet plotësisht deklaratën e Sekretarit të Shtetit.”