Cristiano Ronaldo është i lidhur me një kalim te Atletico Madridi.
Ylli portugez e kërkon largimin nga Manchester United, pasi klubi nuk ia doli në edicionin e kaluar të kualifikohej në Ligën e Kampionëve, garë kjo shumë e dashur për 37-vjeçarin.
Kështu, Jorge Mendes pasi u ofroi top klubeve evropiane shërbimet e pesë herë fituesit të Topit të Artë dhe u refuzua, ai tani po negocion me Los Cholchoneros.
Mirëpo sipas mediave në Spanjë, tifozët e Atletico Madridit kanë filluar fushatën “#ContraCR7” (KundërCR7), duke bërë me dije se nuk e duan portugezin në klubin e tyre.
Gjatë periudhë së tij te Real Madridi, Ronaldo nuk i respektoi mbështetësit e rivalit lokal, por kulmi u arrit kur kaloi te Juventusi dhe e eliminoi Atleticon nga Liga e Kampionëve, duke iu hakmarrë edhe Diego Simeones për gjestin që kishte bërë në ndeshjen e parë.
Mirëpo, derisa strategu argjentinas e ka lënë anash atë skenë, duket se këtë nuk e harrojnë tifozët e klubit, dhe kanë filluar fushatën kundër golashënuesit më të mirë në histori të Ligës së Kampionëve. /Telegrafi/