Kryetari i komunës së Kaçanikut, Besim Ilazi ka sqaruar suspendimin e pesë zyrtarëve të komunal, për shkak të dyshimeve për keqpërdorim të parasë publike.
Ilazi ka thënë se ai e ka pasur obligim që t’i suspendojë zyrtarët, në bazë të ligjit, ndërsa ka sqaruar se cili është roli i tyre brenda komunës, njofton Klan Kosova.
“Në momentin kur Prokuroria ka ngritur aktakuzë ndaj zyrtarëve të komunës, unë si kryetar i saj kam zbatuar ligjin. Ata janë anëtarë të Kuvendit Komunal, dy nga ta janë nga Drejtoria e Ubranizmit, ndërsa të tjerët janë të resorëve tjerë”.
Ai ka deklaruar se për bindjen e tij zyrtarët e komunës janë të pafajshëm, por nuk ka sqaruar dot dëmin që pretendohet t’i jetë bërë buxhetit të komunës.
“Unë shpresoj që këta zyrtarë të Komunës të dalin të pafajshëm dhe ta vazhdojnë punën e tyre. Nuk e di vlerën e dëmit që supozohet t’i jetë bërë buxhetit të komunës, por e di që projekti ka kushtuar mbi 60,000 euro”.
“Palmat ka kohë që janë hequr për shkak se nuk kanë mundur t’i bjënë ballë klimës së qytetit, ndaj i kemi zëvendësuar me drunj dekorativ”.
Kryetari i Kaçanikut ka thënë se suspendimi i zyrtarëve është dëm që i bëhet funksionimit të Komunës.
“Jo vetëm këta pesë zyrtarë, por edhe të gjithë të tjerët që mund të akuzohen paraqesin dëm të madh, nëse këto gjëra dalin të vërteta”.
Sa i përket cilësimit që i është bërë komunë që drejton si “çerdhe e radikalëve islamik”, Ilazi ka shprehur mospajtimin e tij me këtë gjë, duke sqaruar se ka kohë që asnjë qytetar i Kaçanikut nuk u është bashkuar grupeve terroriste.
“Është term joadekuat, pasi është ekzagjeruar e gjitha. Ka një periudhë të gjatë kohore që asnjë qytetar i Kaçanikut nuk është bërë pjesë e luftërave jashtë vendit”, tha ai.