Kryetari i Ferizajt, Agim Aliu, shprehet se me dhimbje të madhe kanë pranuar lajmin për vdekjen e katër personave në një aksident trafiku në këtë komunë.
“Me dhembje të madhe, u njoftuam për aksidentin tragjik, pasditen e sotme në rrugën magjistrale Ferizaj-Shtime, përkatësisht në fshatin Koshare, ku humbën jetën tragjikisht 4 qytetarë dhe një tjetër u lëndua rëndë”.
Me këtë rast, përmes telegramit, kryetari i Komunës së Ferizajt, Agim Aliu, ngushëllon familjarët e viktimave që humbën jetën në aksidentin rrugor të kësaj pasditeje dhe njëkohësisht uron shërim të shpejtë për të lënduarin.
“U trondita kur mësova lajmin se në rrugën magjistrale Ferizaj-Shtime, saktësisht në fshatin Koshare, sot, ndodhi një aksident me përmasa tragjike, e ku humbën jetën 4 qytetarë dhe një u lëndua rëndë. Të pikëlluar jemi sot të gjithë, nga ky aksident tragjik. Jemi me familjarët e viktimave në këto orë të rënda për to. Presim që sa më parë të zbardhen shkaqet që çuan në aksident dhe apelojmë për shtim të kujdesit në trafik. Njëkohësisht i urojmë shërim të shpejtë të lënduarit nga ky aksident. Ngushëllime të sinqerta familjarëve, miqve e të njohurve të viktimave që humbën jetën sot tragjikisht në këtë aksident rrugor” përfundon telegrami i ngushëllimit./Telegrafi/
