Kryeministri i Kosovës, Ramush Haradinaj, ka theksuar se fyerja e përfaqësuesit të OVL – UÇK-së, Nasim Haradinaj ndaj ambasadorit amerikan në Kosovë, janë në kundërshtim me etikën e diskursit publik dhe normave të cilave iu përkushtohemi si qytetarë të Kosovës.
Ai këto komente i ka bërë në profilin e tij në Facebook, ku ka thënë se në kohën kur Kosova po ballafaqohet me debat të brendshëm rreth Dhomave të Specializuara, gjuha fyese është e dënueshme.
“Deklarimet fyese nuk i bëjnë nderë askujt dhe dëmtojnë proceset tona zhvillimore. Fyerja e shprehur publikisht e Nasim Haradinaj është në kundërshtim të plotë me etikën tonë të diskursit publik dhe normat të cilave iu përkushtohemi si qytetarë të Kosovës. I bëj thirrje të gjithëve që të distancohen dhe të përmbahen nga të shprehurit e një fjalori të tillë ndaj kujtdo qoftë”, ka shkruar Haradinaj. /Telegrafi/