(E plotësuar) Presidenti i Republikës i Italisë, Sergio Mattarella nuk e ka pranuar dorëheqjen e kryeministrit Mario Draghi.
Andaj, ai refuzoi dorëheqjen dhe kërkoi të verifikohej në Parlament nëse qeveria ka ende shumicën.
Mattarella e ka ftuar Draghin “të raportojë në parlament dhe të vlerësojë situatën”, tha në një deklaratë zyra e kreut të shtetit.
Kështu, Draghi do të raportojë në parlament të mërkurën. /Telegrafi/
Kryeministri italian Draghi njofton se do të japë dorëheqje
Kryeministri i Italisë, Mario Draghi, ka thënë se do të japë dorëheqjen të enjten mbrëma.
Kryeministri fitoi një votëbesimi në Senat më herët gjatë ditës, por e ardhmja e qeverisë së tij ishte në dyshim pasi Lëvizja populiste 5-Yje bojkotoi votimin, duke e futur koalicionin e tij në krizë.
Votimi ishte 172-39, por senatorët e 5-Yje munguan pasi konfirmuan se nuk do të merrnin pjesë në votimin për një projekt-ligj për lehtësimin e kostove të larta të energjisë.
“Unë do t’i paraqes dorëheqjen time presidentit të republikës këtë mbrëmje”, i tha Draghi kabinetit, sipas një deklarate të lëshuar nga zyra e tij, shkruan Euronews, përcjell Telegrafi.
“Koalicioni i unitetit kombëtar që mbështeti këtë qeveri nuk ekziston më”, ka shtuar ai.
Qeveria e gjerë e unitetit kombëtar e Draghit u formua në shkurt 2021 me parti në të djathtë dhe të majtë për të ndihmuar Italinë të rimëkëmbet nga pandemia e shkaktuar nga COVID-19. /Telegrafi/