Kryeministri i Etiopisë, Abiy Ahmed, ka thënë se disa nga ushtarët që hynë në bazën e zyrës së tij javën e kaluar kishin dashur ta vrisnin atë.
Sipas mediave të huaja, përcjell Telegrafi, Abiy dhe ushtarët u panë duke qeshur, por ai i tha parlamentit se “brenda unë kam qenë shumë i shqetësuar”.
Gjatë gjashtë muajve të fundit, ai ka bërë disa reforma të mëdha dhe tha se disa nga trupat donin t’i bllokonin ato.
“Marshimi i disa anëtarëve të ushtrisë në Pallatin Kombëtar [zyra e kryeministrit] nuk ishte vetëm i paligjshëm, por shumë i rrezikshëm, sepse qëllimi ishte të bllokoheshin reformat në vazhdim”, tha z. Abiy gjatë sesionit pyetje-përgjigje.
“Ndërkohë, pasi situata u vu nën kontroll, disa forca u dëgjuan duke thënë: Ai u arratis para se ta vrasim”.
Një ngjarje e tillë shkruajnë mediat, ka ndodhur më 10 tetor, sipas të cilave, disa qindra ushtarë protestues, disa prej të cilëve ishin të armatosur, shkuan të shihnin kryeministrin, duke kërkuar rritje pagash.
Situata shkaktoi alarm, duke çuar në mbylljen e rrugëve në zonë dhe të interentit për orë të tëra. /Telegrafi/