Destinacioni i njohur italian i udhëtimit Capri është aktualisht i paarritshëm për jorezidentët dhe turistët pa rezervime hotelesh.
Situata u nxit nga një problem teknik në ishullin italian që shkaktoi ndërprerjen e furnizimit me ujë, transmeton Telegrafi.
Të shtunën, kryebashkiaku i Capri, Paolo Falco lëshoi një urdhër që ndalon të gjithë jorezidentët dhe turistët ditorë të ankorohen deri në një njoftim tjetër.
Urdhri detyroi disa tragete në rrugën për në Capri nga Napoli dhe Sorrento të ktheheshin në port.
“Ne kemi punuar gjatë gjithë natës për të siguruar dërgesat e ujit dhe cisternat që transportonin ujë, të cilat kanë mbërritur. I kërkoj falje të gjithëve, por nuk mund të bëja asgjë, prioriteti im duhet të ishte parandalimi i një emergjence të kujdesit shëndetësor”, tha kryebashkiaku Falco.
“Situata shëndetësore dhe higjienike është shpërthyese, ne kemi marrë kundërmasat tona dhe kemi aktivizuar njësinë e krizës dhe kemi dhënë urdhër kufizues”, shtoi kryebashkiaku.
Capri aktualisht është i varur nga rezervuarët e tij për ujë. Çisternat e ujit pritet të mbajnë një furnizim minimal derisa të zgjidhet çështja e ujësjellësit.
I ndodhur në Gjirin e Napolit, Capri ishte destinacioni më popullor i Italisë për udhëtarët e huaj në maj dhe qershor. Këta kalojnë mesatarisht katër ditë në ishullin me 13,000 banorë të përhershëm. /Telegrafi/