Demokratja më e fuqishme e SHBA-së, Nancy Pelosi, ka vizituar një sallon flokësh në San Francisko, duke thyer rregullat të cilat lejojnë shërbimin vetëm jashtë, në mënyrë që të frenojnë përhapjen e koronavirusit.
Pelosi u pa gjithashtu me një maskë fytyre që më shumë ishte rreth qafës sesa mbi gojën e saj. Ajo ka kritikuar presidentin Donald Trump për mosmbajtjen e maskës.
Një zëdhënës tha se ajo nuk e kuptoi se po shkelte rregullat e qytetit të saj. Trump tha se ajo po “shkatërrohej” pasi dha leksione për të gjithë të tjerët.
Mijëra biznese të Kalifornisë janë mbyllur përgjithmonë për shkak të pandemisë. Pamjet e marra nga Fox News treguan të hënën kryetaren e Dhomës së Përfaqësuesve brenda ambienteve të sallonit.
Një stilist flokësh, i cili kishte maskë, u pa duke e ndjekur atë. Pelosi – e cila gjithmonë mban maska në publik – shpesh paralajmëron Republikanët që “të dëgjojnë shkencën” në pandemi.
Duke mbrojtur vizitën e saj, zëdhënësi Drew Hammill tha në një deklaratë: “Ky biznes i tha asaj se ishin lejuar nga autoritetet vendore të kishin një klient në të njëjtën kohë në biznes”. “Kryetarja u pajtua me rregullat siç ju paraqitën nga salloni”.
Pelosi vetë ka cituar më parë udhëzimet e Qendrave të SH.B.A.-së për Kontrollin e Sëmundjeve, që rekomandojnë që Amerikanët të mbajnë maska fytyre në publik, veçanërisht kur masat e distancimit fizik janë të vështira për tu respektuar.
Pas kësaj, kryetarja e Dhomës u paraqit në MSNBC me Urën e Golden Gate në sfond. Ajo i tha rrjetit se Trump kishte “goditur shkencën në fytyrë” javën e kaluar duke lejuar një audiencë të ftuarish, kryesisht pa maska në kopshtin Shtëpisë së Bardhë që të shikonin fjalimin e tij në Konventën Republikane. /oranews/