Kryetari i Federatës së Futbollit të Kosovës (FFK), Agim Ademi dhe nënkryetari Bakir Burri kanë vizituar sot (e mërkurë) ekipi përfaqësues të Kosovës U21 në stadiumin “Rexhep Rexhepi” në Drenas.
Dardanët e rinj tash e disa ditë janë duke u përgatitur për ndeshjen e parë kualifikuese për Evropianin 2023 kundër Andorrës, e cila zhvillohet më 8 qershor në stadiumin “Fadil Vokrri”.
Gjatë kësaj vizite kryetari Ademi ju uroi mirëseardhje lojtarëve të rinj që kanë zgjedhur ta përfaqësojnë Kosovën, si dhe i uroi për një fillim të mbarë të kualifikimeve.
Kryetari Ademi e lavdëroi punën që po bëhet në ekipin përfaqësues U21, derisa kërkoi nga të gjithë futbollistët që të punojnë me përkushtim, ngase ata janë e ardhmja e ekipit A të Kosovës.
Djelmoshat e rinj nesër (e enjte) do të luajnë ndeshje testuese me ekipin e Gjilanit, në mënyrë që ta presin sa më të përgatitur sfidën e parë të këtyre kualifikueseve. /Telegrafi/
