Një gjykatë ruse ka vendosur ta dëgjojë çështjen e “ekstremizmit” kundër rrjetit politik të kritikut të burgosur të Kremlinit, Alexei Navalny derisa Moska kërkon ta shpall të paligjshme këtë lëvizje që është kundërshtare e Vladimir Putin.
Kjo seancë, e cila do të jetë e mbyllur për publikun, është pjesë e një goditje gjithëpërfshirëse ndaj kritikut më të shquar të Putinit dhe mbështetësve të tij pasi Navalny i mbijetoi helmimit me agjentin nervor Novichok.
Si pjesë e përpjekjes – e cila vjen disa muaj para zgjedhjeve parlamentare – Dhoma e Ulët ka vendosur të debatoj Projektligjin që ndalon anëtarët e organizatave “ekstremiste” të zgjidhen si ligjvënës.
Prokurorët rusë në muajin prill kërkuan që rrjeti rajonal i Navalnyt dhe Fondacioni i tij Kundër Korrupsionit të shpallet si organizatë “ekstremiste”, duke i akuzuar ata për komplot për të organizuar një kryengritje të mbështetur nga Perëndimi në Rusi.
Një vendim i tillë gjykate do ta vinte Navalny dhe mbështetësit e tij dhe mbështetësit financiarë në të njëjtin nivel me anëtarët e grupit Shteti Islamik dhe Al-Kaidës dhe do t’i kërcënonte ata me dënime me burg.
“Opozita do të shtypet. Duke shkatërruar opozitën, ata po shkatërrojnë legjitimitetin e tyre”, i tha AFP-së, Abbas Gallyamov, një analist i pavarur politik.
Navalny u shfaq si udhëheqës i opozitës ruse një dekadë më parë, duke udhëhequr protesta të mëdha anti-Kremlin të nxitura nga pretendimet për mashtrim elektoral të zgjedhjeve të 2011-së.
Themeluar në vitin 2011, Fondacioni Kundër Korrupsionit ka publikuar hetime të shumta mbi stilin e jetës të elitës ruse.
Edhe pse Navalny nuk u lejua të kandidonte kundër Putinit në një zgjedhje presidenciale të 2018-së, autoritetet për vite me radhë kishin toleruar lëvizjen e tij politike.
Opozitari rus u arrestua më 17 janar kur u kthye nga Gjermania pasi u shërua nga helmimi i orkestruar nga Kremlini. Ai po vuan dënimin në një burg rreth 100 kilometra në lindje të Moskës. /Telegrafi/