I shkurtë ka qenë ballafaqimi i deputetit të PDK-së, Elmi Reçica, me Gjykatën. I akuzuar për mosdeklarim të pasurisë ose deklarim të rrejshëm, Reçica është deklaruar se nuk e ndjen veten aspak fajtor.
Por, me të nisur seanca e parë e shqyrtimit kryesor, prokurori Rexhep Maqedonci ka hequr dorë nga ndjekja penale e deputetit të PDK-së, raporton KTV.
“Asnjë fakt nga aktakuza nuk e përmend se qëllimi i të akuzuarit në rastin konkret ka qenë fshehja e lartësisë të së ardhurave të realizuara nga i akuzuari”, ka deklaruar Maqedonci.
Për shkak të kësaj, Gjykata e ka hedhur poshtë krejtësisht rastin për të, që sipas një dëshmie të Kadri Veselit në Gjykatë më 2012, Elmi Reçica kishte qenë zv. shef i SHIK-ut deri në shuarje të organizatës.
Rasti kishte nisur më 2013 kur Agjencia Antikorrupsion kishte bërë kallëzim penal, sepse Reçica kishte mospërputhje rreth 6 mijë euro në deklarimin e pasurisë.