Kryetari i PDK-së Memli Krasniqi, ka deklaruar se si parti politike janë shprehur se fushata zgjedhore mund të mbahet në vetëm pak ditë apo edhe në anulim të gjithë fushatës, por jo edhe të ditës së zgjedhjes.
Ai pas takimit të partive politike me presidenten e Kosovës Vjosa Osmani ka bërë të ditur qëndrimin e PDK-së sa i përket fushatës zgjedhore.
“Ne kemi shprehur qëndrimin që jemi të gatshëm ta shkurtojmë maksimalisht fushatën apo edhe të pezullohet totalisht fushata konvencionale e takimeve dhe tubimeve publike, që të ketë respektim rigoroz të masave të vendosura nga Qeveria dhe të rekomanduara nga institucionet përkatëse shëndetësore, por po ashtu kërkova që t’i jepet prioritet vaksinimit të trupave zgjedhor, të komisionarëve në mënyrë që ata të jenë të mbrojtur dhe të mos jenë në rrezik të bartjes së infeksionit në ditën e zgjedhjeve. Kam kërkuar përshpejtim dhe dencentralizim të procesit të vaksinimit për gjithë qytetarët e Kosovës… Qëndrimi jonë është që shëndeti i qytetarëve është prioritet, por karshi shëndetit të qytetarëve është edhe shëndeti i demokracisë”, tha ai.
Ai tha se partitë opozitare janë shprehur të gatshme që të mos ketë fushatë zgjedhore, por që tha se një mbështetje të tillë nuk e kanë marrë nga kryetari i LVV-së.
“Opozita u shprehëm që të mos fushatë fare apo vetëm disa ditë, por nuk e morëm një konfirmim apo gatishmëri të tillë nga kryetari i LVV-së Albin Kurti, ndërsa sa i përket vendimit mendoj se nuk do të ketë shtyrje të procesit zgjedhor…Nuk pati propozim të saktë për ndonjë datë të caktuar”, tha Krasniqi.