Ministri i Kulturës, Rinisë dhe Sportit në qeverinë e Kosovës, Memli Krasniqi, ka dërguar telegram ngushëllimi për familjen Allajbegu, me rastin e vdekjes së trajnerit të njohur në sportin e mundjes, Mentaz Allajbegu.
“E nderuara familje Allajbegu. Me shumë pikëllim morëm lajmin për vdekjen e trajnerit kampion, modelit më të mirë të një mësuesi sporti, trajnerit të mundjes, Mentaz Allajbegu. Puna e tij përbën një histori në vete për zhvillimin e sportit ndër-shqiptarë e që më së miri është kulmuar me medaljet e arta në shumë gara ndërkombëtare, deri edhe në lojërat olimpike”, thuhet në letrën e Ministrit, Krasniqi.
“Vizioni dhe metodat e tij të punës së tij ishin të rralla. Ai, edhe kur të gjithë pushonin e gjente veten duke organizuar kampe të rinjsh vetëm e vetëm për t’i aktivizuar ata me not e sporte të tjera të ndryshme. Iniciativa e tij që sportin e mundjes ta zgjerojë edhe në qytetet e Kosovës pati sukses i cili vërehet edhe në gjeneratat e sotshme”.
“Vdekja e tij është një humbje shumë e madhe për sportin mbarëshqiptarë por edhe në gjithë Ballkanin. Por ai dhe gjithë jeta e tij do të mbetet një shembull brilant për punë dhe suksese të gjeneratave të tanishme dhe atyre që do të vijnë. Duke bashkë ndjerë dhembjen me Ju, familje e nderuar, dhe gjithë komunitetin sportiv, shpreh ngushëllimet e mia më të sinqerta!”, thuhet në telegramin e ngushëllimit të Memli Krasniqit, ministër i Kulturës, Rinisë dhe Sportit i Kosovës.
Varrimi i të ndjerit, Allajbegu bëhet ditën e hënë (ora 14:00) në varrezat e Nerezit. /Sporti1/Telegrafi/