I shqetësuar me situatën në skuadër, mbetet kapiteni Driton Krasniqi.
Ai në një prononcim për Gazetaolle.com, flet si fillim për rezultatet e arritur deri më tash. “Këto janë rezultatet më të dobëta të mundshme. Vet pozita ku jemi, e tregon më së miri”, nis bisedën mesfushori me përvojë.
Në pyetjen se kush i ka fajet për një gjë të tillë, ‘Driti’ deklaroi: “Në futboll, humbjet dhe fitoret, duhet t’i ndajmë së bashku, nga kryesia e klubit, shtabi teknik dhe futbollistët. Por, në këtë rast, faji kryesor është i neve futbollistëve sepse ne e kemi fjalën kryesore në fushë. Nuk duhet harruar se në disa ndeshje nga ka munguar edhe fati”.
Tutje, futbollisti i cili ka bërë karrierë edhe në Shqipëri, thotë se ekipin ‘bardhekaltër’ e pret një punë e madhe. “Kemi kohë të mjaftueshme, na pret një punë e madhe dhe duhet të komponohemi mirë me kryesi, shtab teknik dhe me futbollistë që të dalim nga kjo situatë. Përforcimet cilësore janë të mirëseardhura, tre deri në pesë futbollistë, mirëpo, është e vështirë pasi që në afatin e janarit, thuajse shumica e lojtarëve janë me kontrata”, vlerësoi Krasniqi.
Ai në fund tha se futbollistët e Prishtinës nuk kanë probleme me paga. “Jo, nuk kemi probleme me paga. Vonesat janë normale, por mos të harrojmë se Prishtina është i vetmi klub që i paguan lojtarët 12 muaj”, përfundoi Driton Krasniqi.