“Krahu u Shkupit” i Lëvizjes Besa sot në Pallatin e Kulturës në Tetovë ka mbajtur kongresin e parë të partisë, ku kanë zgjedhur strukturat partiake dhe kryetarin e partisë.
Të pranishëm në kongres kanë qenë 542 delegatë, të cilët janë zgjedhur me mandat katër vjeçar.
Kryetar i partisë së Lëvizjes Besa nga kongresi i sotëm është zgjedhur Afrim Gashi, i cili edhe ka qenë i vetmi i propozuar nga delegatët.
Për zgjedhjen e tij si kryetar kanë votuar 522 delegatë, 12 kanë qenë kundër, ndërsa 8 kanë qenë të përmbajtur.
Në fjalimin e tij ai tha se zgjedhja e tij, përveç krenarisë është edhe përgjegjësi dhe detyrë e rëndë. Gashi tha se kanë konsultuar ekspertët e vendit, që qytetarët ta shohin si të ardhme dhe ta ndërtojnë vendin tonë, e jo të ikin. Ai tha se ata kanë skicuar zhvillimin e arsimit, shkencës, kulturës dhe shumë fushave tjera në vend.
Në kongresin e sotëm të kësaj partie ka pasur mysafirë të ndryshëm, ku ndër tjerë ka qenë edhe Menduh Thaçi, Luan Tresi, Ilmi Aziri dhe të tjerë.
Ushtruesi i detyrës së kryetarit të Lëvizjes Besa – krahu i Shkupit, Nexhbedin Kahremani, para delegatëve në kongres, tha se partia Besa lindi si domosdoshmëri e nevojës për të çuar përpara kërkesat e shqiptarëve të Maqedonisë, të cilat nuk ishin materializuar nga partitë e mëhershme shqiptare./Telegrafi/