Komisioni Qendror i Zgjedhjeve (KQZ), ka njoftuar se pas përfundimit të votimeve, i gjithë angazhimi i tyre është i përqendruar në shpalljen e rezultateve përfundimtare.
Zëdhënësi i KQZ-së, Valmir Elezi në një konferencë për media bëri të ditur se sot ka nisur numërimi i votave për kandidatë edhe në 14 komuna.
“Procesin e numërimit të votave për deputetë dhe verifikimin e votave të subjekteve politike, e kemi filluar gjatë ditës së martë, në qendrat komunale të numërimit në komunat Prishtinë, Lipjan, Obiliq dhe Partesh. Gjatë ditës së sotme, e mërkurë në orën 16:00 është planifikuar të filloj procesi i numërimit në qendrat komunale të numërimit në komunat Deçan, Gjakovë, Drenas, Gjilan, Fushë Kosovë, Kamenicë, Mitrovicë e Jugut, Skënderaj, Shtërpcë, Viti Ranillug, Kllokot dhe Mitrovicë e Veriut”, ka thënë Elezi, duke shtuar se në orën 13:00 procesi i numërimit ka nisur në Han të Elezit.
Ai ka sqaruar më tej se krahas numërimit të votave të kandidatëve, do të bëhet edhe verifikimi i votave të subjekteve politike nga formularët të cilët janë plotësuar në vendvotime.
“Në Qendrat Komunale të Numërimit, përveç procesit të numërimit të votave të kandidatëve për deputetë, do të bëhet verifikimi i votave të subjekteve politike nga formularët të cilët janë plotësuar në vendvotime pas numërimit të votave për subjektet politike. Ky verifikim është paraparë me aktet nënligjore që janë miratuar nga KQZ qysh para shpalljes së datës së zgjedhjeve dhe sigurisht se kjo do të heq të gjitha dilemat që janë krijuar gjatë problemeve në publikimin e rezultateve preliminare për subjektet politike”, tha Elezi.
KQZ-ja ka ripërsëritur se integriteti i votës nuk është i cenuar dhe se pavarësisht vonesave që janë shkaktuar si pasojë e problemeve me platformën elektronike, rezultatet përfundimtare nga zgjedhjet e 9 shkurtit “do të jenë të sakta”.
Sa i përket çështjes se sa merr kohë numërimi i një kutie të votimit, Elezi ka sqaruar se kjo lidhet direkt me pjesëmarrjen e votuesve në një vendvotim.
“Pra vendvotimet që kanë pjesëmarrje më të lartë normalisht që marrin kohë më shumë, duke shtuar se votuesit kanë mundur të përzgjedhin deri në 10 kandidatë. Se sa do të marr kohë numërimi i vendvotimeve në një Qendër Komunale të Numërimit është vështirë të përcaktohet ndonjë afat kohor, por zakonisht në rrethana të tilla një tavolinë numërimi mund të bëjë numrin e dy kutive brenda dite nëse kemi një pjesëmarrje relativisht mesatare të votuesve në zgjedhje, kur pjesëmarrja është më e lartë atëherë duhet më shumë kohë”, tha Elezi.
Ai tutje shtoi se pas përfundimit të numërimit në qendrat komunale të numërimit, është faza tjetër e procesit që është numërimi i votave me kusht, personave me nevoja të veçanta dhe votat nga votimi jashtë Kosovës. /Telegrafi/